Aurtengoa lehenengo aldia da kiroldegiko pilotalekuan egiten dutela, orain arte Santa Ana antzokian egin izan dutelako. "Santa Ana lekuz mugatuta dago; pilotalekuan jende ugari izan da eta jendeak aldaketa eskertu digu", azaldu zigun Txantxiku Ikastolako Jabi Agirrek. Bi emankizun egin zituzten egun berean: bata, bazkal ostean, ikasleendako; eta bestea, 18:00etan, gurasoendako eta beste herritar guztiendako. 700 bat lagun batu zituzten.
Ikasleak, protagonista
4 urteko umeek koreografiak egin zituzten; 1. mailakoek ingelesezko antzezlan bat; bigarren mailakoek Aratusteetan ikasitako koreografiak; bosgarren mailakoek bertso trama; eta DBH 1ekoek Oh happy day ikuskizuna irudikatu zuten. Horrez gain, ikastolako kantu tailerrekoek pare bat kantu abestu zituzten.
Zapatu goizean ate irekiak izan zituzten; eta arratsaldez, urtero egin ohi duten moduan, Pirritx, Porrotx eta Mari Motots. 1.040 sarrerak agortuta. Eta umeak? Pozarren. Zer esanik ez, ikuskizunean esku hartu zuten 5 urteko Oñatiko umeek.
Asteburuko jaia Korrikarekin bukatu zuten Txantxiku Ikastolakoek; eta oso balorazioa ona egin dute jaiarena. Horrez gain, eskerrak eman gura dizkiote kiroldegia prestatzen lan egin zuten guraso guztiei, euren ahalegina handia izan ei zelako.