Lau kupo ezberdin
Kurtideerixako eremuan diren 48 etxeak lau kupo ezberdinetan zozketatuko dira. Alde batetik, ezgaitasunen bat edo mugikortasun arazoak dituzten eskatzaileen artean etxe bat zozketatuko da.
Beste alde batetik, hiru seme-alaba edo gehiago dituzten eskatzaileen artean hiru etxe zozketatuko dira. Beste hiru etxe banatuko dira Etxebideko zerrendan lau urtez edo gehiagoz izena emanda duten eskatzaileen artean.Azkenik, gainontzeko 41 etxeak kupo orokorrean zozketatuko dira. Gainera, lehenengo etxebizitzen zozketa Oñatin erroldatuta egotearen baldintza betetzen dutenen artean egingo da, eta adjudikatu bariko etxeak geldituz gero, baldintza hori betetzen ez dutenen artean zozketatuko dira. Edozelan ere, kupo bakoitzean etxebizitza barik geratzen diren eskatzaileek, bigarren aukera izango dute kupo orokorreko zozketan.
2006ko diru-sarrerak
Kurtiderixako etxebizitza tasatuak eskuratu nahi dituztenek Udalak zehaztutako hainbat baldintza bete behar dituzte. Zozketan parte hartzeko ez da derrigorrezkoa Oñatin erroldatua egotea, baina, lehentasuna edukiko dute. Baldintza ekonomikoei dagokionez, eskatzailearen 2006. urteko diru-sarrerak hartuko dira kontutan. Hain justu ere, 27.000 eta 54.165 euro artekoak izan behar dira. Era berean, etxebizitzaren titular kide guztien diru-sarrerak hartuko dira kontutan azken zenbatekoa egiteko. Bestalde, etxe tasatuak eskuratzeko eskaera egiten duten lagunek ezingo dute beste etxebizitzarik jabetzan eduki azken bi urteotan, Espainiako Estatuan.
Kalifikazioa
Kurtiderixako etxeek eta baita garajeek Babestutako Etxebizitza kalifikazioa iraunkorra izango dute. Hortaz, hirugarren pertsona bati saldu nahi izanez gero, prezioa ezingo da behin-behineko kalifikazioan finkatutakoa baino handiagoa izan.