Etxea erosi gura dutenek, urtean 21.000 eta 57.750 euro arteko diru-sarrerak egiaztatu beharko dituzte. Gainera, etxeko titular kide izango diren guztien sarrerak hartuko dituzte kontuan, iazko errenta aitorpenaren arabera. Zozketa egiterakoan Oñatin bizi direnek lehentasuna izango dute, Oñatin erroldatua egotea derrigorra ez den arren.
Lau kupo
San Martineko etxe tasatuen zozketan lau kupo berezituko dituzte: mugikortasun urria dutenen kupoa (etxe bakarra), familia ugariena (hiru logelako bi etxe), Etxebideko zerrendan lau urte baino gehiago izena emanda dutenena (bi etxe), eta kupo orokorrarena (zazpi etxe).
Logela bakarreko etxeak
Ugarkalde 11. eta 12. zenbakietan dauden logela bakarreko babes ofizialeko etxeetarako izenematea zabalik dute. Zozketa berezia egingo dute, eta etxe barik geratzen direnek kupo orokorreko zozketan parte hartuko dute.