Pake Lekuko 1.400 bazkideek jaso dute batzarrerako deialdia eta hautagaien zerrenda gutun bidez. Berez, 1.600 bazkide ditu erretiratuen elkarteak, baina 200 bat 80 urtetik gorakoak dira, eta ez dute urteko kuota ordaintzen. Hortaz, ez dute botoa emateko eskubiderik.
Presidente bera
Urteko batzar orokorra bi zatitan banatuko dute. Lehen zatian 2009ari errepasoa egingo diote; besteak beste, iazko memoria irakurriko dute, eta elkartearen kontuak izan dituen sarrerak eta irteerak azalduko dituzte. Gainera, 2010erako aurrekontua eta helburuak azalduko dituzte.
Bigarren zatian, zuzendaritza batzordea berrituko dute. 14 kidek osatzen dute batzordea, eta bosteri erreleboa hartzeko ordua heldu zaie. Euren lekukoa hartzeko zazpi hautagai ditu zuzendaritzak, eta batzarrean parte hartzen dutenek bost aukeratu beharko dituzte.
Pake Lekuko presidentea ez dute aldatuko, eta beste urtebetez Ana Mari Zumaldek beteko du kargu hori.
Hitzaldia
Bestalde, hilaren 13an hitzaldia egingo dute erretiratuen elkartean 17:00etan. Nagusilanen laguntzarekin afektibitatearen eta sexualitatearen gainean egingo dute berba. Hitzaldia gazteleraz egingo dute.