Arrakasta itzela izan zuen barikuan, Oñatiko gaztelekuko topalekuan, Pablo Mezzelani argentinarrak eskainitako musika saio didaktikoak. Mundu osoan zehar batutako instrumentu etnikoen gaineko azalpenak adi entzun zituzten 50 eta 60 gazte artean.
Ordu eta erdiko saioan, 50 bat instrumentu erakutsi zizkien, irudiez lagunduta; tartean Euskal Herrikoak ere, hala nola, txistua edo muxugitarra. Horrez gain, antzekoak diren tresnen arteko aldeen gaineko azalpenak ere eman zizkien. Saioa amaitzean, instrumentuak gertutik ikusteko aukera izan zuten gazteek.