"Jendea ez dago lanerako gertu, eta duela bi urte ekintza ezberdinak antolatzeko lantaldeak osatu baziren ere ez dute ondo funtzionatu". Laixan elkarteko egungo arduradunen hitzak dira. Azaro amaieran ez ohiko azken batzarra egingo dute bazkideek. Estatutuen aldaketa onartuko dute bertan. Hortik aurrera eten egingo da Laixanen jarduna. Bazkideen zerrenda mantendu egingo da, baina ez zaie kuotarik pasako, eta elkarteak ez ditu urteroko dirulaguntzak eskatuko.
Estatutuak berrituko dituzte
Ez da gaurko kontua. Laixanetik aspaldi jakinarazi zuten jendea falta zela lanerako eta elkartearen etorkizuna kolokan zegoela. Elkartea bera betiko ixtea mahai gainean izan duten proposamena izan da. Azkenean, ez dela erabakirik egokiena adostu dute eta erdibideko neurria hartu dute. Hori bai, bazkideek gutxienez urtean behin elkartzeko saiakera egingo dute afari bat edo antolatuz.
Elkarteak aurrera eramaten zituen ekintzak herriko beste talde batzuei bideratu zaizkie, San Migel jaietako paella jana eta balkoitik balkoira bertso saioa esaterako. Beste ekintza batzuk, aldiz desagertu egin dira, Arrasate-Oñati lasterketa kasu.
Laixanen aspaldi honetan egon den beste hausnarketa bat da euskara elkarte baten egitekoen artean ote dagoen orain arte antolatutako kultura eta kirol ekintza guztiak antolatzea.