Euskal Herriko lurpea ezagutzeko ekimena da Mugarik gabeko lurpea izenez aurkeztu dutena. Ekimen hori Euskal Herriko hainbat koba edo leizek elkarlanean antolatu dute: Urdazubi-Urdax, Sara, Zugarramurdi, Pozalagua, Mendukilo eta Oñatiko Arrikrutz dira ekimenaren bultzatzaileak. Kontuak kontu, senidetutako koba horiek guztiek liburuxka bat atera dute, eta liburuxka horrekin, aipatutako kobak bisitatzeagatik deskontua egingo zaio bisitariari; eta gainera, koba guztiak bisitatutakoan opari bat ere emango zaio ekimen horretan parte hartzeagatik. Aukera paregabea, beraz, gure herriaren barrunbeetara bidaia egiteko eta horiek ezagutzeko.
liburuxka nola erabili
Koba horietako batera joaten den guztiari Mugarik gabeko lurpea delako liburuxka emango diote. Hala, kobako sarrera erosi ostean, liburuxkari zigilua jarriko diote. Hori eginda, ekimen horren parte diren gainontzeko koba guztietan %20ko deskontua izango du bisitariak. Hori bai, liburuxka bakoitza pertsona bakarrak erabil dezake. Azkeneko koban oparia ere banatuko dute.