Dena den, bi parkingetan sartzen diren autoen erdiak baino gehiagok, %54,9, ez zuten ezer ordaindu; hau da, 30 minututik beherako egonaldiak izan dira. Gainerako erabiltzaileek, %45,1, ordaindu egin zuten.
Udal arduradunek kaleratu dituzten datuetan ez dira agertzen aparkalekuetarako sarrerak libre egon diren egunak; besteak beste, San Migel eta Errosario jaietako egunak.
Krisiarengatik eta erabiltzaile kopurua igotzeko hartu dute tarifak ez igotzeko erabakia udal arduradunek. Erabiltzaileak erakartzeko beste neurri bat ere hartu dute: aparkalekuen berri ematen duen seinaleztapena hobetuko dute, batez ere herrira datozen autoak parkingetara bideratzeko.
Plazak erosteko aukera
Bestalde, lurrazpiko parkingetan marradun plazak alokatzeko aukera ematen du Udalak. Egun osorako plaza gura duenak 90 euro ordaindu beharko ditu hilean; eta, egun erdirako bada (09:00etatik 21:00etara, edo 21:00etatik 09:00etara) 52 euro. Informazioa eskatzeko edo izena emateko udal bulegoetara joan beharko dute interesatuek.
Bestalde, Kalegoienako aparkalekuan 52 garaje daude salgai oraindik. Salmenta indartzeko eskatzen zituzten baldintzetatik bat kentzea erabaki du Udalak; hain zuen ere, erroldari dagokion baldintza. Hortaz, Kalegoienan garajea erosi gura dutenek ez dute Oñatin erroldatuta egon beharko. Gainerako baldintzak eskuragarri daude udal bulegoetan.