Olakua auzoko zatia
Olakua auzoko bidegorriko lehen zatia orain dela aste batzuk bukatu zuten. Hain zuzen ere, Bidaurretako biribilgunetik ahateen urmaelaren parean dagoen autobus geltokirainoko bidegorria egin zuen Construcciones Ugarte enpresak. Legazpi alderako noranzkoan eskuineko bidegorria egin dute. Aurrerago egingo dute ezkerraldekoa.
Olakua auzoko bi bidegorriak Urrutxuko kirol gunetik hasita Ugarkalden bukatuko den ardatz nagusiko tramuetako bi izango dira.
Bi adar nagusi eta sei bide-adar
Ander Irazustak egindako proiektuak3,8 kilometroko bi adar nagusi (Kurtzekua-Berezao eta Urrutxu-Ugarkalde) eta sei bide-adar egitea aurreikusten du. Lehen adar nagusiak Kale Zaharra eta Bidebarrieta zeharkatuko du, eta Elorregitik Oñatira Foru Aldundiak egingo duen bidegorriarekin bat egingo du. Bigarren adar nagusiak Urrutxun eraikiko den kirol-gunetik abiatuta, Unibertsitate Etorbidea, Portu Kale, Santa Marina, Euskadi Etorbidea eta Lazarraga kaleak zeharkatuko ditu.
Bestalde, bi adar nagusiekin bat egingo duten sei bidegorri motzagoak aurreikusi ditu Irazustak; hain zuzen ere, Kalegoiena-Aita Lizarralde; Atzeko kale-Kalebarria-Lazarraga; Zubibarri-Irizar-Gerriko kantoi; Patrue kale-Arantzazuko Ama; Lizaur-Zubikoa; eta Errekalde. Guztira, hiru kilometro osatuko dute sei bide-adarrek.