Lantzeko Aratusteetako dantzak kaleratuko ditu Oñatzek 100 herritarren laguntzarekin

Aratuste-zapatuan, hilaren 21ean 12:00etan irtengo dira Errekaldeko entsegu lokaletik. Kalerik kale ibiliko dira dantzak erakusten 14:30ak arte. Etxe Aundi jatetxean bazkalduko dute, eta 17:30ean kalejira egingo dute. Amaieran, dantzak egingo dituzte eta Mielotxin erreko dute plazan. Domeka arratsaldean aldiz, Oñatz taldeko dantzariek Luzaideko dantzak eskainiko dituzte herriko plazan.

Bi aste falta dira Aratusteetarako, eta Oñatz taldekoek dena gertu dute Aratuste-zapaturako. Egun osoan zehar ibiliko dira kalerik kale Lantzeko aratusteetako dantzak eskainiz.
Abenduan hasi zituzten entseguak, baina dantzak kalera ateratzeko herritarren laguntza izango dute: guztira, 100 bat herritar irtengo dira kalera. "Iazko lagun kopuru bera elkartu gara, eta eguaztenero eta zapatuero txintxo-txintxo etorri dira entseguetara", esan digu Oñatz taldeko Jesus Irizarrek.
Aratuste-zapatuan Lantzeko aratusteetako dantzak egingo dituzte bereziki, baina Patxi Perez musikariaren kantuekin muntaia prestatu dute: "Iparraldeko musikaria da eta erromerietako musika egiten du. Hortaz, koreografia erakargarriak egin ditugu, Lantzeko dantzak nahiko serioak dira-eta", dio Irizarrek.
Entseguetan talde ezberdinak egin dituzte. "Parte-hartzaileak taldeka banatu ditugu Lantzeko dantzak ikasteko. Bestalde, Patxi Perezen koreografiak guztiok batera ikasi dituzte, oso errazak ziren-eta. Egia esan, lan ona egiten dihardute".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.