Fusioari bidea errazteko, hainbat ekintza egin ditu Natrak. Hala, bere kapitala %50 handituko du, oraingo ekitaldiko inbertsioak eta zorren ordainketari aurre egiteko. Hain zuzen ere, 16,094 milioi euro akziotan emititzea onartu du. Horien balio nominala 1,2 euro izango da, eta akzio bakoitzeko 1,45 euroko prima izango da; hortaz, 42,65 milioi gehituko dizkio bere kapitalari.
Joan zen abenduaren 31n, Natrak 311 milioiko finantza-zor garbia zeukan.
Dagoeneko bat egiteko ados daude Natra eta Barry Callebaut, eta, hainbat komunikabideren arabera, badirudi ekainean barrena bukatuko dela bat egitea, eta irailean burutuko dela: hain zuzen, beti komunikabide horien arabera, Barry Callebaut enpresak Natraren kapitalaren %30 eta %49,9 artean hartuko luke, Stollwerk-en truke; eta Natrako gaur egungo akziodunek enpresaren %50 eta %70 artean kontrolatuko lukete.
Berregituraketa
Bat-egite horren eraginez, Natrak erabaki du taldea negozio-lerroka berregituratzea, bi subholding-en bidez, "hazkundea eta eraginkortasun handiagoa erraztuz". Hain zuzen, lerro batek kakaoarekin eta txokolatearekin lotutako negozioak hartuko ditu; besteak, Natraceutical eta Bodegas Torre Oria negozioak.