Iaz Euskaliten ziurtagiria jaso zuen Oñatiko Etxe-Aundi jatetxeak. Baina ez ziren horrekin konformatu, eta 'Q'aren bila joatea erabaki zuten.
Zortzi hilabetetan ikastaroak eta 'Q'a jasotzeko baldintzetara egokitzeko lanak egin ostean, jaso dute saria. Adierazi digute pozik hartu dutela, egindako lanaren aitortza delako. 'Q'a ematerakoan baloratzen dutena ei da elikagaiak hornitzaileei eskatzetik platerean jartzera bitartean dagoen guztia; hozberoei buruzko datuak hartu behar izaten dituzte, elikagaien freskotasuna aztertu eta zaindu, eta garbitasuna ere oso kontuan hartzen dute: lehen ere egiten zituzten gauzak omen dira, baina orain araututa eta kanpoko kontrol batekin.
Taldean egindako lana izan omen da. Orain arte moduan jarraituko dute Etxe-Aundin, eguneko menuak, menu bereziak, karta eta ospakizunetarako banketeak eskaintzen, kalitatearen 'Q'a zergatik eman dieten erakutsi nahian.