Ez da lehia erraza izan. Hiru ariketa egin behar izan dituzte partaideek: lehenengoan, eta hiru minuturen barruan, epaimahaiak izendatutako bi lekutan gelditu behar izan du artzainak txakurra eta gero astiro sartzeko agindua eman.
Proba amaituta, zortzi txakur pasatu dira bigarrenera: Bizkor, Txiki, Izar, Aurki, Txiki, Nuca, Usso eta Scott. Artaldean zegoen lekutik hartu eta zelai barrenean jarritako makila baten ondora ekarri eta bertan txakurra eta artaldea gelditu, eta jarraian eskumako ala ezkerreko hesi artetik pasatu behar izan dute sei minutuko denboran.
Lau txakurrek eskuratu dute hirugarren ariketarako txartela: Bizkor, Aurki, Usso eta Scott.
Saridunak
Jauregiren txakurra izan da erregularrena eta finena, 301 punturekin irabazi du. Bigarren Areta-Llodiotik etorritako Fidel Alonsoren Aurki geratu da bi puntu gutxiagorekin.
Hirugarren Pierre Pomiesen Usso geratu zen eta laugarren Pascal Cacheuren Scott.