Infantil mailako eskubaloi jokalari onenak Zubikoan izango dira bihar

Infantil mailako eskubaloi jokalari onenek parte hartuko dute bihar Zubikoan jokatuko den II. Korpus eskubaloi txapelketan. Goiz eta arratsaldez izango dira partiduak; guztira zortzi selekzio ibiliko dira nor baino nor gehiago. Zubikoa kiroldegiko kantxa berdean izango dira partiduak.

Gipuzkoa, Bizkaia, Nafarroa eta Euskadiko promesak izango dira parte hartuko duten selekzioak; bai nesketan eta baita mutiletan ere. Ibarreko sei jokalari ibiliko dira jokoan, denak oñatiarrak: Aitor Billar eta Ander Varela mutiletan, eta Alazne Aierbe, Leire Ugarte, Igone Anduaga eta Lore Iñurritegi nesketan. Gainera, Gipuzkoako nesken selekzioko entrenatzailea Iñaki Kantero oñatiarra izango da.

Goizeko 9:30ean neskek hasiko dute txapelketa: Gipuzkoa eta Euskadik jokatuko dute. Ondoren mutilen txanda etorriko da; 10:30ean Gipuzkoa eta Euskadik jokatuko dute. Beste finalerdiak, bai nesketan eta baitan mutiletan ere Bizkaia eta Nafarroak jokatuko dute –neskek 11:30ean eta mutilek 12:30ean–.

Arratsaldean finalak

Hirugarren eta laugarren posturako lehia 15:30ean hasiko da eta finalak 17:30ean –neskena–, eta 18:30ean –mutilena– izango dira.

Sari banaketa 20:00etan izango da plazako kioskoan. Bestalde, Aloña Mendik gonbidatuta, jokalari guztiek Pago Uso elkartean bazkalduko dute, bi txandetan banatuta. Antolatzaileak gustura daude, eta txapelketa indartzea espero dute.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.