Berrikuntza askorik ez du izango festak, baina iazkoa hobetzen ahaleginduko dira antolatzaile taldekoak. Bestalde, Garagardo Festak bi helburu ditu: alde batetik, 14 sailen artean banatzeko, ahalik eta diru gehien batzea, eta, beste alde batetik, sailen arteko harremanak sendotzea.
Oilasko izterrak
Garagardoak izango dira nagusi plazako aparkalekuan jarriko duten 450 metro koadroko karpan. Iaz zortzi garagardo egon ziren aukeran, eta batzuk agortu egin ziren; hortaz, aurten hiru gehiago jarriko dituzte dastatzeko. Edatekoaz gain, jatekoa ere egongo da: txerrikumea eta saltxitxa mota ezberdinak jarriko dituzte, eta iaz egondako oilasko erdiaren partez, oilasko izterrak egongo dira patata erreekin. Aloñako 14 sailetako kideak egongo dira zerbitzari lanak egiten.
Bertsolariak eta trikitilariak
Garagardo Festaren inguruan beste hainbat ikuskizun egongo dira, besteak beste, bertsolariak eta trikitlariak; baina, oraindik ez dute egitaraua osatu. Sorpresak egongo direla ere aurreratu dute antolatzaile taldekoek.