127.000 euro
Kanpaina honen helburua herritarren ekarpenekin 127.000 euro jasotzea da.
Oñatiarrek etxean jasoko duten eskutitzean, kuota bidez, dirulaguntzak bideratzeko proposamena egingo zaie. Hala, sei, hamabi edo hemezortzi euroko kuota ordaintzeko proposamena egingo zaie, edo norberak gura duen beste kopuru bat. Ordainketa hori kontu korronte bidez edo Internet bidez egin daiteke.
Herritarren laguntza eskatzeaz gain, Parrokiako ekonomia batzordea herriko enpresetara ere zuzenduko da, euren laguntza eskatzeko.
Parrokiako kanpandorrea, klaustroaren kanpoko hormak eta elizaren sarrera nagusia garbitu eta konpontzeko lanek 724.000 euroko aurrekontua dute.
Parrokiako kanpandorreko erlojua konpondu egingo dute
Oñatiko Mikel Goiaingeruaren Parrokiako kanpandorrea garbitzeko lanak tarteko, kanpandorreko erlojua konpontzeko erabakia hartu du Udalak. Bada, kanpandorrea zaharberritzeko lanek aukera paregabea ematen dute erlojuaren instalazioa konpontzeko, kanpandorrea bera aldamioz inguratuta dago-eta.
Kanpandorreko erlojua gaizki dago: lau esferetatik bi (plazara eta Kale Zaharrera alderako esferak) hondatuta daude. Bestalde, erlojuaren orratzak mugitzen duen mekanismoa zaharkituta dago, eta hori ere aldatu egin behar da.
Erlojuaren mantentzea egiten duen Tecnikronos enpresak egingo ditu konponketa lanak. Gaur egun erlojuak dituen esfera, aro, orratz eta transmisioko mekanismo zaharrak desmuntutako dira. Hala, horien ordez, metakrilatozko lau esfera berri jarriko dira, eta baita esfera berriendako orratz eta aro berriak ere. Lanon aurrekontua 8.224 euro da.