Jaia bukatzeko, luncha
Amaiera festa 09:15ean hasiko dute gurasoek. Eurek izan dira eskola kirolean parte hartu duten taldetako arduradunak. 10:30era arte jokoak egingo dituzte. Jarraian, sari banaketa ekitaldirako prestaketa lanak egingo dituzte. Sariak, 11:30ean banatuko dituzte. Festa bukatzeko, 13:00etan, luncha egingo dute parte-hartzaile guztiekin.
Urrian hasten dira
Udako oporren ondoren eta Sanmigelak bukatuta hasten dute eskola kirola programa herriko ikastetxetan. 5 urtetik DBHko laugarren mailara arteko umeek eta gazteek askotariko kirol ekintzak egiten dituzte. 2009-10 ikasturtean 542 neska-mutiko ibili dira eskola kirolean: 252 Txantxiku Ikastolakoak; 145 Elkar Hezi eta Mikel Aozaratza ikastetxetakoak; eta 145 Errekalde Herri Eskolakoak eta Zuazolakoak.
Neska-mutiko batzuek zapatuetako partiduetara joaten dira bakarrik; beste batzuek, aldiz, astegunetan egiten dituzten entrenamenduetan parte hartzen dute. Horietan ikasten dituzte kirol bakoitzari buruzko oinarrizko arauak.
Gurasoen lana
Ikastetxe bakoitzak eskola kiroleko koordinatzaile bat du, eta eurek antolatzen dituzte aste bukaerako partiduak. Dena den, gurasoen inplikazioa ezinbestekoa da. Eurek dira taldeen arduradunak, banaka edo binaka. Zapatuetako partiduetan jokalarien kontrola egiten dute. Jokalariak animatu, kirol bakoitzaren oinarriak gogorarazi eta aldaketak egiten dituzte, besteak beste.