Oñatiko alkate Lourdes Idoiagak azpimarratu du egun pozgarria dela debagoiendarrentzat; izan ere, orain arte Elgoibartik etorri behar izaten zuen anbulantziak. Hala, itxaron denbora 30 minututik bost minutura jaitsiko dela esan du Oñatiko alkateak. Gaineratu du benetan pozgarria dela ibarrerako osasun zerbitzu berria aurkeztea; are gehiago larrialdi zerbitzu bat bada.
Laugarren anbulantzia
Diputazioak 33.000 euro gastatu ditu Zubillagako zerbitzuan. 90 metro koadroko azalera egokitu dute horretarako. Lau pertsonentzat bi logela, 20 takila, bulegoa, sukaldea eta beste hainbat zerbitzu jarri dituzte. Guztira 15 profesional ibiliko dira lanean Zubillagan: bost mediku, bost erizain eta bost gidari.
Debagoiena osoa
Zubillagako anbulantziak 70.000 pertsonei emango die zerbitzua. Debagoienaz gain, Arabako Aramaio eta Legutio, eta Bizkaiko Elorrioko gaixoak ere artatuko ditu. Esan behar da, orain arte Donostia, Tolosa eta Elgoibarren zeudela anbulantzia medikalizatuak; Oñatikoa Gipuzkoako laugarrena izango da.
19.000 irteera
EAEn 10 anbulantzia medikalizatu daude; iaz, 2007an, 18.987 larrialdi irteera egin zituzten anbulantziok. Gonzalezek esan du aurtengo urtean iaz baino %3 irteera gehiago egin direla dagoeneko.