Guraso Eskolako ikasturte berrian parte hartu gura dutenek izena emateko epea zabalik dute 943 03 77 00 telefonora deituta; baina lehentasuna izango dute aurreko ikasturtean jardun zutenek: "Iaz taldea osatu zuten guraso guztiei bidali dizkiegu gutunak, eta eurek izango dute lehentasuna. Dena den, pertsona gehiagok izena emango balu, talde berriak sortuko genituzke", esan digu Udaleko Prebentzio teknikariak.
Eskola egun bakoitzean hiru orduko lana egingo dute. Teoria eta praktika tartekatuko dituzte, eta etxeko lanak ere egingo dituzte. "Gurasoen eta adituaren artean antolatzen dituzte eskolak", dio prebentzio teknikariak.
Ikastetxeen laguntza
Guraso Eskolaren helburuari buruz galdetu diogu teknikariari: "Gurasoei sortzen zaizkien arazoak azaldu eta irtenbideak topatzeko aukera eman gura diegu eskola horiekin; betiere, adituen laguntzarekin".
Guraso Eskolaren gaineko informazioa zabaltzeko eskolen laguntza izan dutela esan digute: "Gurasoen parte-hartzea gainbehera zetorren, eta iazko ikasturtea hasi aurretik estrategia aldatzea erabaki genuen. Eskolen bitartez gutunak bidali genituen, eta gurasoen erantzuna oso ona izan zen".