Ondo hasitakoa ondo amaitu dute Aloñako mutilek, baina ez sufrimendurik gabe. Partidua hasi eta berehala ipini dira markagailuan aurretik. Korner batean gola egin du Mikel Ibabek, eta partidua alde ipini da etxekoendako. Zarauztarrendako berdinketaren gola 35. minutuan etorri da.
Atsedenetik bueltan, etxekoak zelaian kokatu ezinik zebiltzala beste zorte kolpea izan dute; txartel gorria eta penaltia alde. Iker Olaldek egin du jaurtiketa, baita gola sartu ere.
Markagailua alde egonda eta arerioa jokalari bat gutxiagorekin geldituta pentsatzekoa zen norgehiagoka lasai amaitzeko moduan egongo zirela etxekoak. Ezta gutxiago ere! Zarauztarrek erakutsi dute garaipenaren bila etorriak zirela.
Kanpotarrek bost korner eta alboko bi sake izan dituzte norgehiagokaren azken 10 minutuetan. "Garaiera handiko jokalariak dira eta tentsioa handia izan da norgehiagokaren azken unera arte", azaldu du Roberto Idigoras kapitain oñatiarrak.
KRONIKA ZABALA ASTELEHENEKO GOIENKARIAN