Kooperatiba baten lan egiten duen pertsonaiaren istorioa kontatzen du. "Protagonista Euskal Herrian bizi da. Hiri handi baten familia izan du, baina bere jaioterrira bueltatzen da, eta kooperatiban hasten da lanean. Esperientzian oinarritutako literatura da, egungo familia zein laneko bizipenak jasotzen dituena", esan digu Fermin Etxegoienek.
Bi urte liburua idazteko
Bi urte pasa eman ditu eleberria idazteko. "Egunero idatzi dut zerbait. Eguneroko lana izan da, bestela 15 urte beharko nituzke liburua bukatzeko!", esan digu.
Liburuarekin gustura dagoela azaldu digu: "Nire helburua zen eleberri entretenigarria eta irakurterraza egitea, eta lortu dudala uste dut. Dena den, irakurleek esango dute gustatu zaien edo ez!".
Eleberria bukatu ondoren, idazten jarraitu gura duen galdetu diogu: "Ni lanbidez kazetaria naiz. Hiru urte egon nintzen, egunero, iritzi artikulua idazten Berrian, eta horrek idazketarako grina piztu zidan. Idazten hasten zarenean, ezin duzu utzi. Dena den, nire asmoa ez da eleberri bat bukatu orduko, beste bat idazten hastea".
Kalakako gidoilaria
Fermin Etxegoien (Oñati, 1966) kazetaria da lanbidez. Egun ETB1eko Kalaka saioko gidoilaria da. Aurretik, Katu kale, Doctor Livingstone, supongo, Ciudadanos eta Lau haizeetara saioetako gidoigile izan da. Era berean, egun, Gaztea irratian Ekaitz Perfektua saioa egiten du. Bietan jarraitzeko asmoa du: "Kalaka saioa asterokoa da –eguenetan ematen dute ETB1en –, hortaz egun gogorrak izaten ditugun arren, ondo antolatzen dugu astea. Irratia gustuko dut, musika zalea naiz-eta".