200 neska-mutiko inguru irten ziren danborradan, gehienak danborra jotzen. Hala, bost konpainia izan ziren denera. Ekainean hasi zituzten entseguak eta denek ere gustura asko ibili zirela adierazi zuten, batez ere, plazan jo zutenean. Desde Udana a Zubillaga eta Despierta juventud izan ziren arratsaldean zehar jotako piezak; baita, nola ez, San Miguel martxa ere.
Danbor joleez gain, Oñatin ohitura den moduan beste hiru taldetxo ere irten ziren: sukaldariena, iñudeena eta errementariena. Herriko elkarteak ere presente egon ziren, 16 neskatxak eramandako ikurrinei esker; txikienek, euren mozorro dotoreak jantzi eta txorimaloen eskutik egin zuen danborradaren ibilbidea. Plazan egindako joaldi nagusiaren ostean neska-mutikoek gozoki poltsatxo bana jaso zuten.
Aurten dena ondo irten bada ere, antolatzaileek esan zuten datorren urtean eskertuko luketela herritar gehiagoren laguntza.