Eska daitezke garapen bidean dauden herrietarako laguntzak

Hain justu ere, maiatzaren 7ra arte aurkez daitezke proiektuak. Dirulaguntzak banatzeko deialdia martxoko osoko bilkuran onartu zuten eta apirilaren 4ko Gipuzkoako Aldizkarian kaleratu zen. Laguntza jasotzeko interesa duten erakundeek udal bulegoetan egin beharko dute eskaera. Era berean, egin gura duten proiektuaren txostena aurkeztu beharko dute. Udaleko Gizarte Zerbitzuek guztira 131.240 euro bideratuko dituzte proiektuetarako; iaz baino 5.000 euro gehiago banatuko dituzte.

Laguntza lau ataletan

Garapen bidean dauden herrialdeetako proiektuak egin ahal izateko partidako %40 bideratuko dute. Hain zuzen ere, garatzeko asmotan dauden herrialdeetako bizilagunen osasun baldintzak eta egoera ekonomikoa garatu eta hobetzera zuzendutako proiektuetara bideratuko dute. Guztira, ia 53.000 euro.
Bestalde, gizarte izaerako anaikidetasun proiektuetarako aurrekontuaren %36 bideratuko dute; hau da, 47.200 euro. Azkenik, gainerako %24a emergentzietarako eta herrian bertan egin nahi dituzten sentsibilizazio arloko ekintzetara bideratuko dute.
2008an, hainbat Gobernuz Kanpoko erakundek eta partikularrek 44 proiektu aurkeztu zituzten. Udalak 33 proiektu babestu zituen.

Gizarte Zerbitzuen arlokoak

Bestalde, Udalak, Gizarte Zerbitzuen arloko elkarteei zuzendutako dirulaguntzen deialdia egin du. Dagoeneko, eskaerak aurkez daitezke udal bulegoetan, maiatzaren 6ra arte. Guztira, 13.400 euro banatuko dituzte.
Dirulaguntza eskatu dezakete, Oñatin nahiz eskualdean lan egiten duten irabazi asmorik gabeko taldeek. Laguntza hauekin bi jarduera babestuko dituzte: alde batetik, herrian egiten  dituzten ekintzak; besteak beste, hitzaldiak, zabalkunderako kanpainak eta formazio ikastaroak. Beste alde batetik, erakundeen mantenu gastuak ordaintzeko laguntzak emango dituzte.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.