Lanak barrutik eta kanpotik
Aurrekontu totalaren zatirik handiena (20.500 euro) Ganbar a Abesbatzak entseguetarako erabiltzen duten gela (hiru zenbakiduna) txukuntzea izango da. Gela berean beste lan bat ere egingo dute; hau da, gela intsonorizatu egingo dute (6.900 euro inguru).
Bestalde, bertso eskolako lagunek erabiltzen duten bigarren gela txukundu egingo dute, eta eskolak emateko egoera onean jarriko dute. Lan horien aurrekontua 5.500 euro inguru da. Era berean, eskolan diharduten taldeek erabiltzen dituzten komunak eraberritu egingo dituzte.
Kanpotik ere itxura aldatuko diote Errekaldeko eskola txikiari. Alde batetik, leihoak aldatu egingo dituzte eta aluminiozkoak jarriko dituzte. Beste alde batetik, atondoa eta eskolaren sarrera txukundu egingo dute. Lanok egiteko aurrekontuak eskatu zituzten udal ordezkariek, eta aurkeztutako bietatik Egaralur enpresak egindakoa onartu zuten.
Alkateak esan digu eraberritze lan guztiak batera egingo dituztela, eta datozen egunetan hasiko direla.