Bi adar nagusi eta loturak
Ander Irazustak egindako proiektuan 3,8 kilometroko bi adar nagusi (Kurtzekua-Berezao eta Urrutxu-Ugarkalde) eta sei bide-adar egitea aurreikusten du. Lehen adar nagusiak Kale Zaharra eta Bidebarrieta zeharkatuko luke, eta Elorregitik Oñatira Foru Aldundiak egingo duen bidegorriarekin bat egingo luke. Bigarren adar nagusiak Urrutxun eraikiko den kirol-gunetik abiatuta, Unibertsitate Etorbidea, Portu Kale, Santa Marina, Euskadi Etorbidea eta Lazarraga kaleak zeharkatuko lituzke.
Bestalde, bi adar nagusiekin bat egingo duten sei bidegorri motzagoak aurreikusi ditu Irazustak; hain zuzen ere, Kalegoiena-Aita Lizarralde; Atzeko kale-Kalebarria-Lazarraga; Zubibarri-Irizar-Gerriko kantoi; Patrue kale-Arantzazuko Ama; Lizaur-Zubikoa; eta Errekalde. Guztira, hiru kilometro osatuko dute sei bide-adarrek.
Hainbat mota
Hainbat bidegorri eredu proposatzen ditu Irazustak, hain zuzen ere, kaleen zabalera, ezaugarriak eta zirkulazioa kontuan hartuta. Hortaz, bidegorri eredu mistoa proposatzen du; hau da, zati batzuetan bizikletendako bakarrik diren bideak bereiztuko dituzte, eta beste zati batzuetan, bizikletek autoekin edo oinezkoekin edo biekin batera partekatu beharko dute bidea.
Udal arduradunen asmoa da 2009an erdiguneko lehen zatia egitea. Horretarako, hurrengo urteko aurrekontuetan bidegorria egiteko diru-atala zehaztuko dute.