Joan den astean Bergara eta Aloñaren aurka jokatutako finalerdietan lortu zuten finalerako txartela Eibarko Haritzak eta Zarautzek.
Biak ala biak, maila oneko taldeak dira; hala ere, denboraldiaurrean daudela asko nabaritu zen atzoko finalean, huts asko egin zituzten. Lehia oso parekatu izan zen; lehenengo zatiko lehenengo minutuetan, Zarautz markagailuan aurretik jarri zen. Gero, Eibarreko jokalariek lehia berdintzea lortu zuten.
Berdinketarekin, tentsioa nagusitu zen bi taldeen artean; atsedenera markagailuan aurretik joan gura zuten bi taldeek. Hala, azkeneko minutuetan Zarauzko jokalariek egindako lanak bere saria izan zuen; atsedenera, 10-7 aurretik joan ziren.
Aldagelatik bueltan, Eibarko jokalariak indarberrituta irten ziren. Zarautzekoek, gainera, huts asko egin zituzten; baloi samurrak galdu zituzten eta jaurtiketetan ez ziren fin aritu.
Bestalde, aipatzekoa izan zen Eibarko atezainak egindako lana; hainbat penalti gelditu zituen Jose Angel Fernandezek. Hori dela-eta, amaieran, jokalari onenaren saria jaso zuen Fernandezek.
Penaltiak egon ziren
Finala berdinketarekin amaitu zen (20-20); ondorioz, talde bakoitzak bost penalti bota zituen. Zarautzeko jokalariak hasi ziren penaltiekin; eta, lehenengo hirurak huts egin zituzten. Penaltietan ere, Fernandez atezainak egindako lana txalotzekoa izan zen. Eibarko taldeak, aldiz, bost penaltietatik hiru sartu zituen. Hala, 3-2 nagusitu ziren eta Mikel Deuna txapelketa irabazi zuten.
Bestalde, hirugarren postua lortzeko lehian, Aloña eta Bergara aritu ziren nor baino nor gehiago. Lehia oso parekatu izan zen; atsedenean 11-12 aurretik ziren bergararrak. Bigarren zatian ere jokoa berdintsua izan zen; hala, azken bost minutuak izan ziren erabakigarriak. Etxek taldea indartsu iritsi zen azkeneko minutuetara eta 25-23 irabazi zuen kontsolazio finala. Modu honetan, Aloñak irabazi zuen hirugarren garaikurra.
Amaieran, sari-banaketa egin zuten. Lehenengo hiruren garaikurrak Eibarrek, Zarautzek eta Aloñak jaso zuten. Jokalari onenaren saria, berriz, Eibarko Jose Angel Fenandezek eraman zuen.