Kirol zinegotzi Andoni Gartziak hitza hartu eta hainbat datu azpimarratu zituen: "30 partidutik 26 irabazi dituzue, azken 17ak jarraian. 2.700 puntu egin dituzue... Duda barik, txapeldunen zenbakiak dira". Era berean, Santurtziren kontra Zubikoan jokatutako partidua gogorarazi zuen (108-103 irabazi zuen Aloñak, luzapenean), eta Zubikoan jokatu den "inoizko partidurik onena" izan zela esan zuen.
"Historikoa da"
Ondoren hitza hartu zuen saskibaloi saileko presidente Jose Luis Campok. Taldeko kide guztiei eskerrak eman zizkien egindako lanarengatik, eta egin dutena "historikoa" dela gogorarazi zien.
Azkenik, Xabi Igartua entrenatzailea zuzendu zitzaien osoko bilkuran zeudenei. "Oso pozik nago. Liga oso gaizki hasi genuen (Santurtzin galdu zuten), baina talde bat garela erakutsi dugu, kantxa barruan eta kantxatik kanpo", esan zuen.