Apiriletik irailera arte, nagusien danborradara arte hain justu, irauten dute umeen eta nagusien danborradako prestaketa lanek. Umeen entseguak hasita daude dagoeneko eta nagusiek irailean hasiko dituzte entseguak.
Urte askoko ohitura
1960an egin zen lehenengoz nagusien danborrada Oñatin. Ondoren etenaldi bat egon zen eta urte batzuen ostean ekin zioten berriz ere danborrada antolatzeari. Umeen danborradak berriz, iaz bete zituen 25 urte. Urte hauetan guztietan bi danborraden prestakuntza lanetan hainbat pertsona aritu dira baina duela urte batzuetatik gaur arte antolaketarako jende gutxi dagoela-eta, jendea batu guran hainbat deialdi egin ditu antolakuntzak.
Danborrada egunerako laguntza
Iazko deialdia ez zen oso oparoa izan eta aurten ere, herritarrei deia luzatu gura diote. Lan egiteko prest dagoen edonori luzatzen diote antolakuntzan parte hartzeko deia. Antolatzaileen arabera, lan handiena danborradako egunean bertan egoten da, aurrez, entseguetan-eta hiru lau bat pertsonekin nahikoa izaten baita.
Danborradetan irteteko jendea bilatzeko arazorik ez da egoten, umeak berehala lortzen dira, eta nagusienean ere, herritarren parte hartzea handia izaten da. Jaietan, baina, herritarrek danborradekin disfrutatzen jarraitu gura badute, danbor jotzaileak, dantzariak, musika banda eta parte hartzaile guztiak koordinatuko dituen antolakuntza ezinbestekoa da.