Pasa den abenduaren 14an Irungo FICOBAn ospaturiko galan jaso zuen Oñatiko turismo bulegoak turismo kalitatearen Q-a. Urtebeteko lanaren emaitza izan da lorpen hori, lan gogorra, baina fruituak eman dituena.
Q ziurtagiriak gainera, zerbitzuan eragin onuragarriak ekarri dituela argi dute Oñatiko turismo bulegokoek, bai barruan lan egiteko orduan, eta baita erabiltzaileengan ere.
Ziurtagiriak lortzeko animatu
Herriko eskaintza turistikoari indar gehiago emateko, sektore horretan diharduten enpresa eta departamentuak horrelako ziurtagiriak lortzeko ahalegina egiteko animatu dituzte turismo bulegotik.
Bisitariak gora
2006 urtean jasotako bisitari kopuruak gora egin duela eta, pozik daude turismo bulegoan. Iaz, 16.970 pertsona pasa ziren turismo bulegotik, aurten, kopuru hori %10 igo da, denera 18.575 izan direlarik. Gidatutako bisitak aukeratu dituztenen artean ere, gora egin du Oñatik: pasa den urtean 8505 izan baziren, auren 750 gehiago izan dira: 9255.
Jatorriari dagokionez, Euskadi mailan, gipuzkoarrak dira ugarienak. Estatu mailan aldiz, kataluniarrak, madrildarrak eta valentziarrak dira nagusi, baina nabarmendu behar da Andaluziako bisitariek izan dute gorakada. Atzerritik etorritakoen artean, frantziarrak, iberoamerikarrak eta italiarrak bisitatu dute gehien Oñati.
Fiturren urtarrilean
Datorren urtera begira, datuak hobetzea da Turismo bulegoaren asmoa, Arrikurtzeko koben irekiera aprobetxatuz. Horretarako, datorren urtarrilean Madrilen egongo den Fitur turismo azokan herriko turismo eskaintza aurkeztuko dute.