475 metro koadro izango du eraikin berriak. Hiru solairu izango ditu, bakoitzean bi gelarekin eta solairu bakoitza adin tarte baterako izango da: beheko solairua, zero eta hiru urte bitarteko haurrendako; lehenengo solairua hiru eta sei urte bitartekoendako eta bigarren eta azken solairua, sei eta 12 urte bitartekoendako.
Material eta modu berritzaileak erabiliko dituzte berau egiteko, izan ere, mekano baten gisara montatuko dute, eta kanpoko partea izango da eraikina eutsiko duena. Horrek, lanak era azkarragoan egitea ahalbideratuko du.
Eraikin berriak, txiki utziko du gaur egun Txantxiku Ikastolak duen jolastokia, eta ondorioz, arduradunak hasi dira ikastolaren inguruetako eremuetan aukera berrien bila.
800000 euro
Guztira 800000 euroko kostua izango dute handitze lanek eta finantzatu ahal izateko, Eusko Jaurlaritzaren inbertsio dekretu batez baliatuko dira. Horretarako baina, azaro ingururako lanik handienak bukatuta egon behar dute. Oñatiko udalak era berean, handitze lanak burutzeko beharrezkoak diren lurren lagapena egingo dio ikastolari datozen 75 urteetarako, eta trukean, 56000 euro ordainduko ditu ikastolak. Txantxiku Ikastolako arduradunen asmoa da urtarrilerako erakin berria erabilgarri egotea.