Abenduaren 9an jakinarazi zuten epaimahaiko kide Jose Agustin Gurrutxaga, Benito Cantero eta Josu Garai argazkilariek lehiaketako irabazleak nortzuk ziren. Mendia eta natura atalean 111 argazki jaso dituzte. Bigarren saria Ricardo Gartzia bergararraren Halcon argazkiak irabazi du, eta hirugarren saria Legazpiko Errikarte Agirreren Etna erretratuak. Bestalde, atal honetan herriko argazkilariek aurkeztutako lan onenaren saria Andoni Camposek eroan du Austria I argazkiarekin.
Salaketa atalekoak
Salaketa atalean 44 erretratu lehiatu dira, eta bigarren saria mendia eta natura ataleko iazko irabazle Luis Francisco Llavorik egindako Kurpila argazkiarendako izan da. Aldiz, hirugarren saria Javier Pedro Fernandez bergarrararen Niños callejeros erretratuarendako izan da.
Bestalde, Andoni Camposen Yesa II delako argazkiak jasoko du atal honetako herriko argazki onenaren saria. Azkenik, alpinismoko argazki onena Bergarako Juan Jose Lopezek irabazi du Neila izeneko erretratuarekin.
Profesionalen antzera
Aloña Mendi elkarteko mendi taldekoak pozik dauden lehiaketak izan duen erantzunarekin: "Guztira, 43 argazkilariren 155 argazki jaso ditugu: 111 mendia eta natura atalerako, eta 44 denuntzia atalerako. Argazki batzuen maila ikaragarria izan da. Parte-hartzaile batzuek ia profesionalak direla erakutsi dute". Urtez urte argazki kopurua mantendu egin da.
Erakusketa zabalduko dute
Gaurko sari banaketa ekitaldia bukatu ondoren, lehiaketako irabazleekin eta argazki onenekin erakusketa zabalduko dute, urtarrilaren 3ra arte. Erakusketa 18:00etatik 20:00etara egongo da ikusgai egunero.