Aloñakoek pazko asteko eski irteera Cerviniara egingo dute

Denboraldiari bukaera ematen dion bidaia astebetekoa izango da; hain zuzen ere, apirilaren 11tik 18ra. Bi estazioak erremonte bidez daude lotuta. Guztira, pistetan 400 kilometro dituzte eskiatzeko, eta pistatik kanpo, beste 38 kilometro. Horren harira, eski irteeratan parte hartzeko izenematea urtarrilaren 12an zabalduko dute. Aloña Mendi eski saileko arduradunak Aloña Mendi tabernan egongo dira astelehenero eta martitzenero 18:00etatik 19:30era, urtarrilaren 12tik aurrera.

Bestalde, aste bukaerako hiru irteera egingo ditu Aloña Mendik: urtarrilaren 23tik 25era; otsailaren 20tik 22ra; eta martxoaren 20tik 22ra. Autobusak egubakoitz arratsaldean irtengo dira Oñatitik, eta domekan itzuliko dira eskiatu ondoren. Aste bukaerako egonaldia Baqueira-Bereteko Hipic hotelean egingo dute. Eski saileko arduradunek ez dituzte irteeretako prezioak finkatu, baina izenematea zabaltzen denerako zehaztuta edukiko dituzte.

Forfaitak, merkeago

Aloña Mendi eski sailekoek Pirinioetako eski estazioekin zuten hitzarmena berretsi dute. Horren harira, Aloñarekin edo euren kontura Astunera, Candanchura edo Formigalera eskiatzera doazenek forfaitak merkeago eskuratu ahalko dituzte: Astunen eta Candanchun lau euro merkeago, eta Formigalen sei euro. Forfaitak bi urteko balioa dute eta Oñatiko Mendizabal kirolak dendan eros daitezke.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.