Igeltserotza eta margotzea
Orain dela hamar urte, Aloñako gurutzeak 100 urte bete zituenean, egin zituzten azkeneko aldiz mantentze lanak. Ordutik, gurutzearen inguruak eta aterpearen egoera okerragotu egin dira. "Gurutzearen itxituraren inguruan harriak altxatu egin dira, izotzaren ondorioz. Era berean, aterpeko margoa altxatu egin da, eta margotu egingo dugu barrutik", esan digu elkarteko kide Inaxio Irizarrek.
Bestalde, gaineratu digu gurutzearen itxitura eta gurutzean dauden hiru plakak margotu egingo dituztela. "Batez ere mantentze lanak egingo ditugu; alegia, igeltserotza eta margotze lanak", dio Irizarrek. Azpimarratu digu Udalean dirulaguntza eskatu arren, lan guztia muxu truk egingo dutela: "Elkarteko kideen artean egingo dugu guztia. Dena den, laguntza emateko gertu daudenak beso-zabalik hartuko ditugu. Patrue kaleko Maiztegi Nekazarien Tresnak dendan eman dezakete izena".
Maiatzean edo ekainean
Aloñako Gurutzearen Lagunak Elkarteko kideen asmoa mantentze lanak udaberrian egitea da, baina ez dute data zehatzik ipini gura: "Eguraldiaren araberakoa izango da. Gure asmoa da maiatzean edo ekainean egitea. Ordura arte ezinezkoa izango da Aloñan hotz egiten duelako, eta haizeak gogor jotzen duelako". Egun zehatz barik, bi aste bukaeratan egiteko asmoa dute.