Oñati Abesbatzak hartu zuen parte, ohorezko mezan abestuz. Aita Madinaren urtea izango da aurtengoa Oñatin, eta zelan, musikarekin baino hobe, haren jaiotzaren mendeurrena ospatzeko. Hala, atzo iluntzean, Santa Ana aretoan, kontzertua egin zuten Cristina Sanchez harpa-joleak eta Anouska Antunez piano-joleak haren lau obrarekin: Suite Popular, Cuatro piezas para órgano, Sonata vasca eta Concertino vasco.
Aita Madinaren urtea
Aita Madinaren lan oparoa biziberrituko dute aurten, hain zuzen ere, haren lana eta konposizioen maila gogora ekartzeko. Parrokian izan zen, abenduaren 15ean, lehen hitzordu handia, Donostiako Orfeoia eta Euskadiko Orkestra Sinfonikoarekin. Hala ere, ez dira Oñatin bakarrik entzungo Oñatiko musikagilearen lanen oihartzunak, Azpeitia, Errenteria eta Donostiako Musika Jardunaldietako egitarauetan leku berezia izango dute-eta sormen handiko Aita Madinaren obrek.