Bidaurretako monasterioan hainbat urte eman dituzten Sor Gema Maria eta Sor Maria Magdalena izan dira monasterio berriaren sortzaileak. 2000. urtean, Inchon elizbarrutiko gotzainak gutun bat bidali zuen Bidaurretara. Han zioen Inchonen lehenengo kontenplarien monasterioa sortzekotan zebiltzala; eta Oñatin zeuden moja korearren laguntza eskertuko zuela. Oñatiko moja korearrek baiezkoa eman zuten eta Monasterioa egiten hasteko behar ziren tramite guztiekin hasi ziren.
Frantziskotarren babesa
Moja korearrak 2002. urtean abiatu ziren Koreara. Hasiera batean, Bidaurretako Sor Maria Jesus Odriozola abadesaren laguntza izan zuten Korean. Lehenengo hilabeteak gogorrak izan baziren ere, Korean zeuden frantziskotarren babesa izan zuten mojek; batez ere, Jose Maria Beitia eta Jose Murguzur oñatiarrena.
Zortzi ahizpa
Monasterioa sortzeko jaso duten laguntzen artean, besteak beste, oñatiarrek emandakoa azpimarratu gura izan dute Bidaurretako mojek. “Koreako lurrean Bidaurretaren landaretxo berria sortu da; eta, era harrigarrian loratu da, dagoeneko zortzi ahizpa baitira Komunitatean”, diote Bidaurretan.
Ospakizunak bidaurretan
Koreako monasterioaren inaugurazioa astelehenean izango da; hala, aste bukaerarako hainbat ekintza antolatu dituzte Bidaurretan. Jose Murguzur frantziskotarrak hango berri emango du zapatuan eta domekan. Bestalde, domekan, 19:30ean, Ganbara Txiki abesbatzak eta Jose Manuel Uriagereka frantziskotarrak kontzertua egingo dute.