Sarrera eta gastu arruntek ere behera egin dute: 12,9 milioi euro izango dira, 2009an baino milioi erdi euro gutxiago.
Aurrekontua aztertzerakoan, Lourdes Idoiaga alkateak azaldu du funtsezkoak izan direla bai Foru Fondoaren eta baita hirigintza inguruko aprobetxamendu eta esleipenen jaitsierak, denera 1,5 milioi euro ingurukoak izan direnak.
Aurrekontua lantzeko orduan, gizarte zerbitzuak mantentzea, enplegu plan berria finantzatzea eta zorpetzea inbertsioetarako izatea izan dira irizpide orokorrak.
Hala, iaz zorpetzeko eskatutako kreditua 700.000 eurokoa izan bazen, aurten 2.200.000 euroko kreditua eskatuko da. Inbertsioen partida erdira jaitsi da. Alkateak azaldu duenez gainera, 2008an eta 2009an aurrez finantzatutako lanak ere burutuko dira. Hala, besteak beste inbertsioekin San Lorentzo, Errekalde eta Roke Azkune auzoak eraberrituko dira; bizikleta sareari lotutako herri barruko mugikortasun konpromisoarekin jarraituko da; Osasun Zentroaren irisgarritasun planarekin jarraituko da; eta Ibarrako urbanizazioa egingo da.
Idoiagak gaineratu du, lehen sektoreari diru-laguntzak bideratuko zaizkiola, Oñatiko azokan euren presentzia bermatu eta areagotzeko.
Murrizketak, gastu arruntetan
Diru partiden murrizketen inguruan galdetuta, alkateak azaldu du ura, elektrizitatea, telefonoa, garbitasuna eta diru-laguntzak bezalako gastu arruntak kontrolatu eta murriztuko direla.
Idoiagak gaineratu du zinegotzi eta teknikari guztiek lan gogorra egin behar izan dutela aurrekontu bideragarriak lortzeko. 2010erako aurrekontua duen Debagoieneko lehen herria da Oñati; alkateak adierazi duenez, urtea aurrekontu jakin batekin hasi gura izan dute, eta ez inprobisatzen.
Gaur iluntzeko 19:30ean egingo den osoko bilkuran onartuko da aurrekontua.