San Martin egoitzan egiten diren lanak dira, besteak beste: hirugarren eta laugarren solairuak egokitu eta hirugarrenean, dementzia arazoak eta portaera-desorekaren bat duten 15 erabiltzailerendako tokia izango duen psikogeriatria unitate bat sortu. Unitate horrek 11 logela izango ditu. Eta guztiek bainugela izango dute. Gainera, unitateak jangela bat izango du, eta baita atsedenerako eta ekintzetarako gune bat, erizain gela, bi komun, profesionalen gela eta kontrolerako gunea ere.
Egoitzako iturrien esanetan, urtea amaitu aurretik bukatuko dituzte lanok.
Araudia betetzeko laguntzak
Diru laguntza horiek Foru Aldundiak 2008. urterako duen planaren haritik datoz, Gipuzkoako egoitza guztiek indarrean dauden araudiek ezartzen dituzten baldintzak bete ditzaten. Baldintza horiek direla-eta, logelak handitu, oztopo arkitektonikoak kendu, banakako logela gehiago jarri, elektrizitate sistemak hobetu eta suteen aurkako neurriak jarriko dira, besteak beste.