Xabin Egaña oñatiar artista maiatzaren 19an hil zen. Orduz geroztik, haren omenezko hainbat ekintza egin dituzte, eta azkenekoa da 25 artistak Egañaren oroimenez prestatu duten erakusketa. Gasteizko Zuloa aretoan zabaldu dute, eta irailaren 16ra arte dago bisitatzeko modua. Horrez gain, artistek eskaera bat egin diete erakundeei: Xabin Egañaren atzera begirako erakusketa antolatzea, eta haren lana ikertzea eta zabaltzea.
Margolanak, eskulturak eta marrazkiak batu dituzte 25 artista horiek; erakusketa horretarako propio egindako artelanak dira, gainera. Artista oñatiarrarekin modu bateko edo besteko zerikusia dute lanek, eta haren heriotzak utzitako hutsuneak eragin dizkien sentimenduak adierazten dituzte artelanen bidez.
Xabin Egaña oñatiarra 48 urte zituela hil zen, artean lan oparoa egin ondoren. Azken asteotan bestelako omenaldiak ere egin dizkiote: besteak beste, Ruper Ordorika oñatiarrak eta Garik kontzertua egin zuten, eta Egañak grabatutako bideoklip bat erakutsi zuten.