1991ko maiatzaren 11n hasi zuen Oñati Irratiak emisioa. Hiru orduko saioa egin zutela gogorarazi du Mirenek, 10:00etatik 13:00etara bitartean, hain zuzen ere. Saio berezia izan zela adierazi du. Izan ere, San Migel Txiki jaiak ospatzen ziren egun hartan eta zapatua zen. Gonbidatu askoko saioa izan zen eta San Migel Txikiko jaiak izan arren jai batzordeko kideak bertan izan ziren.
"Hasi ginenetik saioak zenbatu ez izanaren pena daukagu", azaldu du Miren Urkiolak. Hala ere, gogoan du Bob Marleyren abesti batekin hasi zutela lehen saioa eta egun, saioaren sintonia ere horixe dela azaldu du.
Aurrerapen teknologikoak
Hamabost urtetan teknologia asko aldatu da. "Teknika aldatik asko aurreratu dugu eta lana erraztu digu horrek, orain dela ordenagailuz emititzen dugu", esan du. Sakelako telefonoak ere aurrera pausoa ekarri duela adierazi du. Esaterako zuzeneko konexioetarako.
Egoitza berria
Dagoeneko sei urte pasa dira egoitza berrira aldatu zirenetik. Hasieran Oñatiko kultur etxeko ganbaratik emititzen zuten.
Kolaboratzaile asko ditu egun. Izan ere, herritarren irratia izatea dute helburua. Hala, jendearen parte hartzea bultzatzeko, ikastaroak egin zituzten. Horregatik, Miren Urkiolak kolaboratzaile guztiei eskerrak eman dizkie. Arrasate Irratiarekin duen elkarlana ere eskertu du.