Aloñako II. Igoerari hasiera emateko, 254 korrikalari elkartu ziren Oñatiko plazan. Parte-hartzaileen artean 14 emakumeak izan ziren.
Urtiagainen Ionut lehena
Ionut errekorra haustera etorri zen Oñatira. Bere helburua iaz eginiko denbora hobetzea zen. Hala, lasterketa hasieratik aurrean ibili zen. Korrikalariek Oñatiko plazatik irten eta Garagaltzarako bidea hartu zuten. Hortik, Urtiagainera igo ziren. Lasterketaren hasierako ibilbidea zuhaitz artean egin zuten korrikalariek. Eta egiten zuen eguraldia dela-eta, parte-hartzaileek gustura hartu zuten gerizpean eginiko zatia.
Urtiagainera Ionut iritsi zen lehenengo. Hala ere, bigarren eta hirugarrenarekiko aldea ez zen handia izan. Puntu horretara iritsi zen lehenengo emakumea, berriz, Alicia Romero durangarra izan zen.
Urtiagainetik Aloñako tontorrerako bidean Ionutek lehenengo postua galdu zuen. Aloñako gurutzera Imanol Etxeberria iritsi zen lehenengo, 49 minutu eta 24 segundo eginda. Iaz, Aloñara lehenengo iritsi zenak 50 minutu eta 37 segundo behar izan zituen. Imanolen atzetik Arkaitz Sodupe eta Ionut Zinca iritsi ziren Aloñako tontorrera. Lehenengo hiruren artean denbora tarte txikia zegoen, eta, hori aprobetxatuz, Ionutek beherakoan aurre hartu zuen.
Jaitsiera gogorra
Aloñako Igoera mendi lasterketen artean gogorrenetariko da. Izan ere, 16 kilometroan 2.200 metroko gorabehera egin behar dute. Jaitsieran teknikoki ona izatea beharrezkoa da. Eta atzo, Ionutek jaitsieretan maisua dela erakutsi zuen. Beherakoan lehenengo postua eskuratu zuen errumaniarrak.
"Jaitsiera gogorra egin zait. Oinetako oso onak ekarri ditut, baina, hala ere, azkazal guztiak hautsi ditut", esan zigun Ionutek. Antolatzaileak gustura geratu ziren lasterketak izandako harrerarekin. Oñatiko plazan eta Aloñako magalean jende ugari bildu zen lasterketa ikustera.