Alarma sistema jartzen duten dendari eta ostalariei, instalazioaren kostuaren erdia ordainduko die Oñatiko Udalak; gehienez, 200 euro establezimenduko. Horixe da, hiri-segurtasuna aztertzeko, Txanda dendarien elkarteko kideekin martxoaren 28an egindako batzarrean Lourdes Idoiaga alkateak hartutako konpromisoa.
Alarma sistema lehendik ezarrita dutenei, Udalak urteko mantentze kuotaren %85a ordainduko die, 200 euroko mugarekin, kasu honetan ere.
Dendariak eta ostalariak, gustura
Erasotzaileek lapurretak egiten dituzte kasu batzutan, eta pertsianak hondatzen edota kristalak apurtzen bestetan. Arazo horiek ekiditeko, pertsianak eta alarma neurri aproposak direla uste dute dendariek, eta begi onez jaso dute Udalaren erabakiaren berri.
Udaltzain gehiago
Laguntza horien berri emateaz bat, udaltzain kopurua gehitzeko asmoa ere agertu die alkateak Txanda elkartekoei. Egun, sei kide ditu Oñatiko udaltzaingoak, eta beste lau kontratatzeko deialdia egina du Udalak. Epe ertainera, 12 edo 14 laguneko taldea osatu eta zerbitzua asteburutara zabaltzea dira helburuak, asteburu gauetako bandalismo ekintzak ekidin eta segurtasuna bermatzeko.