Ezker Abertzaleak prentsa aurrekoa eman zuen eguen iluntzean Gaztetxeko azken gertakarien inguruko iritzia emateko: Gaztetxea bota izana eta martitzenean gertatutakoak salatu ditu Ezker Abertzaleak eta ekimen hauek arduradun zuzenak dituztela: Andoni Gartzia eta EAJ.
EAJren jarrera
Ezker Abertzaleak salatu du ere EAJk izan duen jarrera. Galdetu du ea zergatik bota duten Gaztetxea, ea hori den gazteek aurkeztutako eta burututako proiektuaren erantzuna. Esan du ere, Gaztetxea uzteko agindua eman ostean eta gazteak 24 orduko txandak egiten hasi zirenean, alkateak esan ziela ez txandarik egiteko, Gaztetxea bota aurretik abisatu egingo ziela eta, nahiz eta orain adierazpen horiek ukatzen dituen.
Salatu du ere EAJren estrategia dela kontrolatu ezin duena botatzea, ixtea eta horretarako ertzaintzaren beharra izatea. EAJren kultura kontrolaren kultura dela esan du Ezker Abertzaleak, ez garapenaren kultura.
Alternatiba eta autokritika
Ezker Abertzaleak esan du Gaztelekua ez dela baliogarri gazte sektore batendako eta orain arteko bidea itxi dutenen esku dagoela orain alternatiba eskaintzea eta eraikitzea. Oñatiko EAJk, Andoni Gartzia buru duela, autokritika serio eta publiko bat burutu beharko duela uste du Ezker Abertzaleak.