Glen Matlock musikariak eta The Philistines bere taldeak kontzertua egingo dute gaur gaztelekuan. On Something disko berria aurkezteko biran daude, eta Estatuan egingo dituzten hiru kontzertuetako bat da gaurkoa. Rock gaua Potemkin taldearen emanaldiarekin hasiko da, gaueko hamarretan. Sarrera 5 euro kostatuko da.
Punk-rockeko izen handia
Sex Pistols taldean hasi zuen bere ibilbidea Matlock-ek. Pretty Vacant, Anarchy in the UK, God save the Queen eta beste klasiko batzuk konposatu zituen. Gero, The Rich Kids taldea sortu zuen. 80eko hamarkadan, Iggy Pop-ekin lan egin zuen, besteak beste.
Bakarkako lan baten ondoren, The Philistines taldea sortu eta Open Mind diskoarekin debutatu zuten. Randy McVeigh eta Koozie Johns gitarra-joleek eta Chris Musto bateria-joleak osatzen dute The Philistines. Adituen esanetan, "jarrera egokia, estiloa eta musika ondare zabala" duen taldea da.