Arantxa eta Arantzazu izena dutenen eguna ospatuko dute domekan, Arantzazun. 200etik gora Arantxek eman dute izena, dagoeneko. Horien artean, duela 56 urte Arantzazun ezkondu zen 83 urteko donostiar bat. Eguerdiko mezaren ostean, Gandiaga Topalekua bisitatuko dute eta gero, bazkaria egingo dute Arantzazuko Ostatuan, musika, opari eta guzti.
Arantxen komisioa
Domekako bazkarian elkarte bat, komisio bat, sortu gura dute datozen urtetako ospakizunak antolatzeko. Asmoa da herri bakoitzeko Arantxa bat edo bi sartzea komisio horretan. Helburuak dira, batetik, ahalik eta Arantxa gehien batzea eta bestetik, hurrengo antolaketak erraztea.
Duela 10-11 urte, 2.000 Arantxa elkartu ziren Arantzazun. Hego Euskal Herri osoko Arantxa guztiei gutun bana bidali zieten orduan. Azkeneko ospakizuna, duela lau urte egin zuten. Orduan ez zituzten gutunak bidali, iragarkiak jarri zituzten soilik eta 400 inguru elkartu ziren. Arantzazuko bi jatetxetan batu ziren orduan. Aurten ere iragarki bidez eta ahoz aho zabaldu dute Arantxa izenekoen eguna.
Joatea gura duenak
Oraindik joateko asmoa dutenek, 30 euro sartu behar dituzte Euskadiko Kutxako kontu korronte honetan: 3035 0170 54 1701019652.