Udal Euskaltegiak Bidebarrieta kalean du egoitza berria eta eguaztenean inauguratu zuten, Pello Zabala frantziskotarraren bedeinkazio eta guzti. Roberto Altuna, euskaltegiko zuzendaria; Jokin Azkue, HABEko zuzendaria; Andoni Gartzia alkatea; Ainhoa Galdos, euskarako zinegotzia; euskaltegiko irakasleak; ikasleak; zinegotziak; gonbidatuak; dantzariak eta musikariak izan ziren Bedita Larrakoetxea euskaltegiaren inaugurazioan.
Ikasturte berria
Gitarra soinuarekin batera, euskaltegiaren ibilbidea gogoratu zuten bertaratutako guztiek kantuan. Aurten, 21. ikasturteari ekin dio Udal Euskaltegiak. Hiru irakasle daude: Roberto Altuna, Koldo Zumalde eta Xabier Zabaleta eta maila guztietan erakusten dute euskara.
Eraikinak 360 metro koadro ditu eta euskaltegiaz gain, herriko beste talde batzuk erabiltzeko aretoak ere badaude.