Aurtengo lau emanaldietatik hiru, hilaren 8, 15 eta 22koak, Santa Anan izango dira, 19:30ean; azkena, hilaren 28koa, Zubikoako pilotalekuan egingo dute, 22:30ean.
Egitaraua Neofusion taldeak hasiko du etzi, domeka. Gaur egungo musika klasikoa eta XX. mendeko era guztietako musika sustatzen du talde horrek. Akordeoiak, biolontxeloak, bi biolinek eta biola batek osatzen dute.
Hilaren 15ean, Oñatiko Ganbara Abesbatzak egingo du emanaldia. Berau egitarauan sartzea erabaki zen 10. urtemuga borobiltzeko modu bezala, eta taldeak aspaldi erakutsi duelako bere maila artistiko handia.
Jazza eta Iparraldeko doinuak
Jazzaren historiaren gaineko kontzertu didaktikoa da eskaintza berezietako bat, hilaren 22an. Tam tametik tom tomera du izenburua eta Pirineos Jazz Orchestra taldeak egingo du. Horren berezitasuna da, musika egiteaz gain, antzeztu ere egiten dutela. Musika beltzaren azpiestilo guztiak erakutsiko dituzte: afrikar erritmoak, bluesa, ragtimea, swinga, rocka
Azkeneko kontzertuan beste oñatiar bat izango dugu: Ruper Ordorika, Hiru Trukurekin oraingoan. Iparraldea Oñatin egitasmoarekin eta Laixanekin antolatutako kontzertua da. Hiru Truku; Niko Etxart, Dominika Etxart eta Robert Larrandaburu; eta Maddi Oihenartek egingo dute emanaldi hori.