Fleury Megoris, Tarascon, Villepinte, Albolote, Murtzia eta Jaengo kartzeletan dauden euskal presoek atzo, urtarrilak 24, hasi zuten ziega barruko itxialdia. Otsailaren 2a bitartean iraungo duen protesta itxialdian, 72 euskal presok hartuko dute parte. Tartean, Joseba Arregi Erostarbe oñatiarra.
Debagoieneko beste lau presok ere astelehenean hasi zuten itxialdia. Hain zuzen ere, hamar egunetako protestarekin jarraituko dute Arrasateko Igor Letonak, Jose Ignazio Gaztañagak eta Jose Gabriel Urizarrek, eta Bergarako Ane Alberdik.
Itxialdi hau, Euskal Preso Politikoen Kolektiboak (EPPK) aurrera daraman borrokaldian, hirugarren txanda da. Euskal presoen itxialdiko lehen txanda urtarrilaren 4an hasi zuten. Hamar egunez ziegetan egon ostean, beste preso talde batek hartu zuen txanda hamar eguneko itxialdia aurrera eramateko.