Eskaintza erakargarria antolatu du Udalak zineklub emanaldietarako. Bihar, eguena, Tim Burton (Eduardo Manostijeras filmaren zuzendaria) estatubatuarraren Big fish fantasiako filma ikusteko aukera izango da. Protagonistak dira EwanMcGregor eta Albert Finney. Burton-ek bere fantasiazko unibertsora gonbidatzen du ikuslea, gizon gazte baten eskutik. Aita hilzorian du, eta horrek bere bizitzaren errepasoa egitera eramango du, baina bizitza hori ipuin bezala ikusita.
Datozen asteotarako, 21 gramos, Lost in translation, Dogville edo Los abajo firmantes bezalako izenburuak daude.
Goodbye Lenin, ikusiena
Zineklub emanaldi zikloak erantzun ona izan du Oñatin. Aurten, apirilean bukatu zen ikasturtea. Aurtengo emanaldi arrakastatsuena, orain arte, Goodbye Lenin filmarena izan zen: 91 ikusle izan zituen. Beste emanaldi arrakastatsu batzuk izan ziren Mi vida sin mí (81 ikusle), Vías cruzadas (75) edo Embriagado de amor (75). Apirilean izan ziren ikusle gehien (batezbesteko, 75).