Oñatiko Garapen eta Turismo Agentziaren egitasmoa izan da Oñati iragana, oraina eta geroa DVDa. Helburua da Oñati irudi digitalen bidez aurkeztea, baina DVDa, bisitariei ez ezik, herritarrei zuzenduta ere badago. Denek ikusi ahal izango dute ekoizpen hori, etzi, eguaztena, kultura etxean, 19:30ean. 13 minutuko aurkezpena izango da.
Bost hizkuntzatan
Oñatiren gaineko ikuspegi orokorra azaltzen du Oñati iragana, oraina eta geroa DVDak: besteak beste, ondasun historikoaren, kulturaren, natura guneen, eta baita gaur egungo zerbitzu eta enpresen berri ere ematen du. Irudi guztiak profesionalek egindakoak dira, eta bost hizkuntzatan editatu dute: euskara, gaztelania, katalana, frantsesa eta ingelesa.
Erosteko aukera izango da egunean bertan, 10 eurotan, nahiz eta dagoeneko salgai dagoen Turismo Bulegoan.