Hiru arrazoi nagusigatik jarri dute abian Ganbara Txiki Abesbatza egitasmoa: batetik, herrian hutsune handia ikusten dutelako haur abesbatza arloan; bestetik, umeen artean abesbatzarekiko dauden mitoak kentzeko, Aitor Biain arduradunen esanetan; hirugarrenik, Ganbara Abesbatzarendako harrobia izango delako talde berria. Partaideek musika hezkuntza bikaina jasoko dute, eta musikaz gozatuko dute.
Adinaren arabera, bi talde osatuko dituzte: txikien taldea (6-10 urte bitartean) eta gaztetxoena (10-14 urte bitartean). Txikiek ordubete entseatuko dute astean, eta gaztetxoek, bi ordu. Denek Errekalde Herri Eskolako lokaletan entseatuko dute.
Denborarekin, Ganbara Txikik urtean kontzertu bat egingo du; egun berezietan (Santa Ageda, Gabonak ) ekitaldiak egingo ditu, eta baita irteeraren bat edo beste.
Izenematea
Izena emateko, ikastetxeetan banatuko dituzten orriak bete behar dira eta idazkaritzan entregatu. Ganbararen webgunean ere izango duzue horretarako aukera. Gainera, ume eta gurasoak deitzen dituzte bilera informatibo batera, irailaren 27an, Santa Ana antzokian, 19:00etan.